Last Modified: January 11 2015 17:19:48.

പൂമരപ്പൊത്തിലെ താമരക്കുരുവീ
രാമപ്പഴം പഴുത്തൂ വനങ്ങളിൽ
സീതപ്പഴം പഴുത്തൂ
മാടിവിളിക്കുന്നു മാന്തളിർ കൈയ്യുകൾ
ഓടിവാ ഓടിവാ പഴംതിന്നാൻ
(പൂമര...)

ഞാനറിയാതെന്റെ പൂങ്കിനാവിന്നലെ
മാനത്തെക്കണ്ടത്തിൽ തിന വിതച്ചൂ
ഓണപ്പുലരിയിൽ തിന വിളഞ്ഞൂ
ഓടിവാ ഓടിവാ തിന തിന്നാൻ
(പൂമര...)

തെന്മലവാരത്തിൽ പൊന്മുകിൽത്തോട്ടത്തിൽ
പുന്ന പൂത്തു പിന്നെ പുളിവിളഞ്ഞു
താമസിച്ചുണർന്നോരു പൊൻകുരുവീ
താഴോട്ടിറങ്ങി വാ പുളിനുണയാൻ
(പൂമര...)