അച്ഛൻ ശങ്കരൻ നായർ, അമ്മ രാധാമണിയമ്മ, സഹോദരിമാരായ സുജാത , നിത്യ, സഹോദരൻ അപ്പു ,മുത്തശ്ശി എന്നിവർ ചേർന്നതാണു ഹരിദാസിന്റെ കുടുംബം.കൊല്ലമ്പറമ്പിൽ ശങ്കരൻ നായർ കുറെക്കാലം മിലിട്ടറിയിലായിരുന്നു.റിട്ടയർ മെന്റിനു ശേഷം നാട്ടിലെത്തി.പക്ഷേ വീട്ടിനുള്ളിൽ ഒതുങ്ങുന്നതായിരുന്നില്ല ശങ്കരച്ചേട്ടന്റെ സ്വഭാവം.നാടു നന്നാക്കാൻ നടന്ന ശങ്കരച്ചേട്ടൻ വീട്ടുകാര്യങ്ങളൊന്നും ശ്രദ്ധിച്ചിരുന്നില്ല.ഉത്തരവാദിത്വമില്ലാതിരുന്ന ഭർത്താവിനെയോർത്ത് വിഷമിച്ചിരിക്കാതെ ഭാര്യ രാധാമണി കുടുംബം കരുപ്പിടിപ്പിച്ചു കൊണ്ടു വന്നു.മൂത്ത മകനായ ഹരിദാസിനു കോളേജ് അദ്ധ്യാപകനായി ജോലിയും കിട്ടി.പഠിക്കാൻ മിടുക്കിയായിരുന്ന സുജാത ഹരിദാസിനു വേണ്ടി പഠിപ്പു നിർത്തി.നിത്യയും അപ്പുണ്ണിയും പഠിക്കുന്നു.ജോലി ആയതോടെ ഹരിദാസ് കുടുംബം നോക്കുമല്ലോ എന്ന് സമാധാനിച്ചിരിക്കുമ്പോൾ ആണു ഹരിദാസിന്റെ വിവാഹം നടക്കുന്നത്.ശൈലജ ആയിരുന്നു വധു. ഭർത്താവിന്റെ വീട്ടുകാരെ സ്വന്തം വീട്ടുകാരായി കരുതാൻ എത്ര ശ്രമിച്ചിട്ടും അവൾക്കാവുന്നില്ലായിരുന്നു.കുടുംബത്തിൽ ഓരോരോ പ്രശ്നങ്ങൾ ഉണ്ടാക്കി ഹരിദാസിനെ കൊണ്ട് വാടക വീടെടുപ്പിച്ച് താമസം മാറ്റുന്നു. കുടുംബത്തൊടുള്ള കടപ്പാട് നിറവേറ്റാൻ കഴിയാതെ ഉരുകുന്ന ഹരിദാസിനെ അവൾക്ക് പുച്ഛമായിരുന്നു.അവളെ സംബന്ധിച്ചിടത്തോളം ഭർത്താവും താനും മാത്രമുള്ള ഒരു ലോകം ആയിരുന്നു അവൾ ആഗ്രഹിച്ചിരുന്നത്.
ഒടുവിൽ ഹരിദാസിനെക്കൊണ്ട് വാടക വീടെടുപ്പിച്ച്, ആഡംബര വസ്തുക്കൾ ഓരോന്നായി വാങ്ങിപ്പിച്ച്, ശമ്പളം മുഴുവൻ ചെലവാക്കുന്നു. ഹരിദാസ് സ്വന്തം വീട്ടിലേക്ക് ഒരു രൂപാ പോലും കൊടുക്കാൻ കഴിയാത്ത അവസ്ഥയിലാകുന്നു .ഇതിനിടയ്ക്ക് ശൈലജയ്ക്ക് ഒരു ജോലി വാങ്ങിക്കൊടുക്കുന്നു.അങ്ങനെ കിട്ടിയ ശമ്പളവും ശൈലജ ഹരിദാസിനോട് ആലോചിക്കാതെ സ്വന്തം അക്കൗണ്ടിൽ നിക്ഷേപിക്കുന്നു.
ഏറെ താമസിയാതെ ശൈലജയുടെ ഓഫീസിലെ ഒരു ജീവനക്കാരനായ പ്രേം ശങ്കർ ശൈലജയുമായി ഇഷ്ടത്തിലാകുന്നു.എല്ലാ അവധിദിവസങ്ങളിലും ഹരിദാസിന്റെ വീട്ടിൽ അയാൾ ഭക്ഷണം കഴിക്കാൻ വരുന്നു. ഹരിദാസിനു ഇത് ഇഷ്ടപ്പെടുന്നില്ല, എങ്കിലും ശൈലജ ഹരിദാസിന്റെ ഇഷ്ടങ്ങൾ അംഗീകരിക്കുന്നില്ല. അവസാനം ഹരിദാസിൽ നിന്നും വിവാഹ മോചനം നേടി , പ്രേം ശങ്കറോടൊപ്പം ശൈലജ ജീവിതം തുടങ്ങുന്നതോടെ ഭാര്യ അവസാനിക്കുന്നു.
