Last Modified: February 29 2012 14:28:17.


ഉത്രം നാളില്‍ പിറന്നാള് ,
അയ്യപ്പസ്വാമി തിരുനാള്
ആറാട്ടിനായ് കൊടിയേറ്റം,
അയ്യപ്പന്മാര്‍ക്ക് പടിയേറ്റം
(ഉത്രം നാളില്‍...)

മുട്ടിവിളിച്ചാല്‍ വിളികേള്‍ക്കുന്നൊരു
മുത്തശ്ശനാണെന്റെ അയ്യപ്പന്‍
കെട്ടിപ്പിടിച്ചാല്‍ മുത്തം തരുന്നൊരു
പെറ്റമ്മയാണെന്‍റെ അയ്യപ്പന്‍
(ഉത്രം നാളില്‍..)

കാൽത്താരു കുമ്പിട്ടാൽ കാത്തുരക്ഷിക്കുന്ന
കാരണോരാണെന്‍റെ അയ്യപ്പന്‍
കുടിലതയറ്റ മനസിന്നകത്ത്
കുടിയേറിപാർക്കുമെന്‍ അയ്യപ്പന്‍
(ഉത്രം നാളില്‍..)

കണ്ണും കരളും കലങ്ങിയ ഭക്തരെ
കണ്ടാലറിയുമെൻ‍ അയ്യപ്പന്‍
തെറ്റും കുറ്റവും ഏറ്റു പറഞ്ഞാല്‍
തെറ്റിദ്ധരിക്കില്ലെന്‍ അയ്യപ്പന്‍
(ഉത്രം നാളില്‍..)